Actividades e
Material Didáctico

Acto Inaugural

A exposición «Wallace e a orixe das especies» inaugurarase o 17 de setembro de 2026 cun programa especial que combinará unha visita comentada á exposición, música, o acto institucional e unha conferencia inaugural a cargo de Borja Milá, comisario da exposición e investigador do CSIC.

Ciclo de Cinefórum

Como influíu a teoría da evolución na ciencia, na sociedade e na nosa maneira de comprender a natureza humana? Este ciclo propón achegarse a algunhas das grandes cuestións relacionadas coa evolución a través do cinema. Catro películas de épocas e xéneros diferentes servirán como punto de partida para reflexionar sobre a evolución humana, o conflito entre ciencia e relixión, a recepción social das ideas de Darwin e as implicacións éticas dos avances da xenética.

Cada sesión incluirá a proxección da película e un coloquio posterior moderado por especialistas en xenética e evolución da Universidade de Santiago de Compostela.

Ciclo de Conferencias Divulgativas

Un ciclo de cinco conferencias divulgativas no que especialistas de recoñecida traxectoria achegarán diferentes perspectivas sobre a evolución, a selección natural, a biodiversidade e a historia do pensamento evolutivo. O público poderá afondar na figura e no legado científico de Alfred Russel Wallace, na súa relación con Charles Darwin e nalgúns dos grandes temas que contribuíron á nosa comprensión da evolución.

Xornada Internacional de Xenómica, Epixenómica e Evolución

Xornada de carácter científico dirixida especialmente á comunidade universitaria e investigadora — alumnado de grao, mestrado e doutoramento, profesorado e persoal investigador —, así como a outras persoas interesadas en xenómica e epixenómica.

A xornada «Do naturalismo aos xenomas: o rexistro da evolución» reunirá no Campus Terra seis especialistas de prestixio internacional para abordar a evolución á luz dos avances máis recentes en xenómica e epixenómica: a orixe de novas especies, a regulación xenómica, a adaptación de poboacións con baixa diversidade xenética e a posible transmisión de marcas epixenéticas entre xeracións.